ក្រុង ប៉េកាំងៈ
ក្រុមហ៊ុន HSBC បានឲ្យដឹងកាលពីថ្ងៃព្រហស្បតិ៍ថា
សកម្មភាពផលិតកម្មរបស់ចិនបានធ្លាក់ចុះជាថ្មីម្តងទៀតនៅខែមិថុនា
នេះដោយធ្លាក់ចុះខ្លាំងបំផុតក្នុងរយៈពេល៩ខែព្រមទាំងជំរុញឲ្យ
មានក្តីបារម្ភអំពីភាពរឹងមាំនៃសេដ្ឋកិច្ចរបស់ប្រទេសដែលមាន
សេដ្ឋកិច្ចធំជាងគេទីពីររបស់ពិភពលោកមួយនេះ។
ធនាគារដ៏ធំរបស់ប្រទេសអង់គ្លេសមួយ
នេះបានបន្តឲ្យដឹងទៀតថា សន្ទស្សន៍វាស់ស្ទង់សកម្មភាពសេដ្ឋកិច្ច
(PMI) ជាបឋមរបស់ខ្លួនមានកម្រិត ៤៨,៣ ដែលទាបជាងសន្ទស្សន៍៤៩,២
កាលពីខែឧសភា
និងជាសន្ទស្សន៍ទាបជាងគេគិតចាប់តាំងពីខែកញ្ញាឆ្នាំ២០១២ មក។
គួរបញ្ជាក់ផងដែរថា តួលេខក្រោម៥០ បង្ហាញពីការធ្លាក់ចុះនៃសេដ្ឋកិច្ច ខណៈតួលេខខ្ពស់ជាង៥០បង្ហាញពីកំណើនសេដ្ឋកិច្ច។
សន្ទស្សន៍
នេះតាមដានសកម្មភាពផលិតកម្មនៅតាមរោងចក្រ
និងរោងសិប្បកម្មរបស់ប្រទេសចិន
និងតាមដានពីស្ថានភាពសេដ្ឋកិច្ចចិនយ៉ាងហ្មត់ចត់។
លោក Qu Hongbin
ប្រធានសេដ្ឋវិទូចិនប្រចាំក្រុមហ៊ុន HSBC
បានឲ្យដឹងក្នុងសេចក្តីប្រកាសព័ត៌មានមួយថា៖
«វិស័យផលិតកម្មបានថយចុះដោយសារការធ្លាក់ចុះនៃតម្រូវការខាង
ក្រៅ ការធ្លាក់ចុះតម្រូវការក្នុងស្រុក
និងកំណើននៃការកាត់បន្ថយសន្និធិតាមហាងទំនិញ»។
ក្រុមហ៊ុន HSBC បានបន្តឲ្យដឹងទៀតថា
ក្រុមហ៊ុនរបស់ខ្លួននឹងចេញផ្សាយសន្ទស្សន៍វាស់ស្ទង់សកម្មភាព
សេដ្ឋកិច្ចចុងក្រោយនៅថ្ងៃទី១ ខែកក្កដាខាងមុខនេះ។
ទិន្នន័យនេះត្រូវបានចេញផ្សាយបន្ទាប់
ពីមានការបង្ហាញសូចនាករ
សេដ្ឋកិច្ចដែលមានកម្រិតខ្សោយកាលពីខែឧសភាដែលបានបង្ហាញថា
ទិន្នផលឧស្សាហកម្ម និងការវិនិយោគទ្រព្យសកម្មថេរ
ដែលជាការវាស់វែងការចំណាយដ៏សំខាន់របស់រដ្ឋាភិបាល និងការនាំចេញ
និងនាំចូលសុទ្ធតែធ្លាក់ចុះទាំងអស់។
លោក Zhang Zhiwei
សេដ្ឋវិទូប្រចាំក្រុមហ៊ុន Nomura International នៅទីក្រុងហុងកុង
បានឲ្យដឹងក្នុងរបាយការណ៍មួយថា៖
«ការធ្លាក់ចុះនេះបានជំរុញឲ្យយើងមានក្តីបារម្ភជាថ្មីជុំវិញ
ហានិភ័យនៃការធ្លាក់ចុះសេដ្ឋកិច្ច»។
ក្រុមសេដ្ឋវិទូមានការព្រួយបារម្ភ
កាន់តែខ្លាំងជុំវិញចក្ខុវិស័យ សេដ្ឋកិច្ចរបស់ចិន
ដែលបានកើនឡើង៧,៨ភាគរយកាលពីឆ្នាំ២០១២
ពោលគឺជាកំណើនទាបបំផុតក្នុងរយៈពេល១៣ឆ្នាំ
ដោយសារតែការធ្លាក់ចុះនៃតម្រូវការទំនិញនាំចេញនៅអាមេរិក
និងនៅតំបន់អឺរ៉ុបដែលកំពុងជាប់បំណុលវ័ណ្ឌក។
សេដ្ឋកិច្ចរបស់ប្រទេសចិនក្នុងត្រីមាស
ទីមួយក្នុងឆ្នាំនេះ អាចសម្រេចបានត្រឹមតែ ៧,៧ភាគរយតែប៉ុណ្ណោះ
ដោយធ្វើឲ្យក្រុមអ្នកវិភាគដែលបានរំពឹងថា
កំណើនសេដ្ឋកិច្ចរបស់ប្រទេសនេះអាចនឹងហក់ឡើងខ្ពស់នៅឆ្នាំ២០១៣នេះ
ខកចិត្តបន្ទាប់ពីសម្រេចបានកំណើនខ្ពស់កាលពីចុងឆ្នាំមុន។
រដ្ឋាភិបាលចិនបានកំណត់ទិសដៅកំណើន
សេដ្ឋកិច្ចសម្រាប់ឆ្នាំ២០១៣ ក្នុងអត្រា៧,៥ភាគរយ
ពោលគឺដូចគ្នាទៅនឹងទិសដៅក្នុងឆ្នាំ២០១២
ខណៈរដ្ឋាភិបាលព្យាយាមកែប្រែគំរូសេដ្ឋកិច្ចរបស់ខ្លួនពីការពឹង
ផ្អែកលើការនាំចេញទៅជាការប្រើប្រាស់ក្នុងស្រុក។
លោក Qu បានថ្លែងទៀតថា៖
«រដ្ឋាភិបាលក្រុងប៉េកាំងចង់ប្រើប្រាស់កំណែទម្រង់ជាជាងប្រើ
កម្មវិធីជំរុញសេដ្ឋកិច្ចដើម្បីរក្សានិរន្តរភាពសេដ្ឋកិច្ច»។
ប្រទេសចិនគ្រោងនឹងចេញផ្សាយតួលេខផលិតផលក្នុងស្រុកសរុបប្រចាំត្រីមាសទី២ នៅចុងខែនេះ៕ ប្រភពព័ត៌មានៈ ភ្នំពេញប៉ុស្តិ៍
0 comments:
Post a Comment